"ක්‍රාස්.. ක්‍රාස්.. කරාස්... කරාස්.. කෲස්... කෲස්...."
එතුමාගේ ගෙවල් පැත්තෙන් යනකොට මොකක්දෝ සද්දයක් ඇහෙනව. ටිකක් අමුතු සද්දයක් නිසා පොඩ්ඩක් ඇතුලට ඔළුව දාලා බැලුවා. කවුරුත් නෑ පේන්න.. ගෙදරත් කවුරුත් නෑ වගේ.. සද්දේ එන්නේ ගේ පිළිකන්න පැත්තෙන්... හිච්චි කොලුවත් හෙමින් හෙමින් කිට්ටු කරල බැලුවා.. එතුමා සරමත් කැහැපට ගහගෙන මොකක්දෝ එකක් කළු ගලක අතුල්ලනවා..
"එතුමෝ.. එතුමෝ.."
"ආහ් මේ හිච්චි කොලුවානේ.. මොකෝ මේ පැත්තේ.."
"සද්දයක් ඇහුන නිසා බැලුවේ.. "
"අප්පා.. මේ සද්දේ පාරටත් ඇහෙනවද? මම මේ අර මඩුව අස්සේ දාලා තිබ්බ කඩුව අරන් මුවහත් කරන්න ගත්තා.."
"ඒ මොකෝ හදිසියෙම... අපි නම් හිතන් උන්නේ මේ කඩුව නැති වෙලා කියලා..."
"යුද්ධෙට නැති කඩුව කොස් කොටන්න ද හිටං"
"යුද්ධේ ??? ඇයි ඒ පාර ආයේ යුද්ධයක්ද?"
"නෑ නෑ.. මම කිව්වේ දැන් ඉතින් කඩුව අතට ගන්න කාලේ හරි කියලා හිතුණා.."
"නිකන් බලන් ඉන්නවට වඩා කඩුව අතට ගන්න එකනම් හොඳයි.. ඒත් මොකෝ මේ එක පැත්තක් විතරක් මදින්නේ? අනික බාගෙට නේ මුවහත් කරන්නේ.."
"අ.. අ... නෑ.. නෑ ඉතින් අර බැදුම් කර වෙච්ච හොරකම කරපු අය තමයි ඉතින්... "
"ඉතින් බාගෙට මදින්නේ?"
"ඇයි කොළුවෝ ඕක තේරෙන්නේ නැද්ද? ගොඩක් මුවහත් වුනොත් ගොඩක් අය කැපෙනවනේ.. එහෙම කරල කොහොමද?"
"ඔහ්හෝ.. ඔබතුමා හදන්නේ මේ පොඩි අතු රිකිල්ලක් දෙකක් කපලා, ලොකු අතු ශේප් කරන්න?"
"කට කට.. උඹත් දැන් පැහිලා වැඩියි.. උඹේ අයියා තමයි උඹවත් නරක් කරන්නේ!"
"එහෙම නෙමේ නේ එතුමා.. කඩුව මදිනවනම් දෙපැත්තම හොඳට මදින්න එපැයි.. අනික ඔබ තුමා කඩුව ඇත්තටම අතට ගන්නවනම් එක පැත්තක් දෙපැත්තක් නෙමේ.. තුන් පැත්තක් කැපෙන කඩුවක් හදා ගනන් වෙයි.."
"තුන් පැත්තක්? කවුද කොළුවෝ ඒ.."
"ඔබ තුමාට දැන් මතකයත් හීන වේගෙන එනවද? ඇයි .. බැදුම් හොරකම් කරපු උදවිය, එතකොට පහුගිය කාලේ එක එක හොරකම් කරල ඔබතුමා අස්සේ රිංගගෙන ඉන්න උදවිය.. අනිත් කට්ටිය අර.. ඔබතුමා පැය 24න් එයාර්පොර්ට් වහලා කපලා දානව කියපු ඔය මොට්ටු තියන්න එන උදවිය?"
"පිස්සු කියවන්න එපා කොලුවෝ.. ඒ අය කපලා කොහොමද..."
"ඇයි?"
"ඇයි කියන්නේ .. ඔහොම කපන්න ගියොත් මොකාද ඉතුරු වෙන්නේ..."
"ඒ වුනාට ඔබතුමා මහ ලොකුවට කිව්වේ.. මේ මගේ අවසාන ඉපදීම.. සොරි.. මේ මගේ අවසාන වාරය.. මම කුණු ඔක්කොම සුද්ද කරනවා.. කියලනේ... ඇයි මේ දැන්?"
"මේ කොලුවෝ... උඹට මම.. දුවපන් මෙතනින් මගෙන් කඩු පාර නොකා.. ආවා මෙතන පණ්ඩිත කතා කියන්න.. උඹේ වයසට ඉඳින්..."
එතුමට කේන්ති ගිහින්... දුවපන් කකුල් දෙක දුවපන් කියලා හිච්චි කොලුවත් දුවන්න ගත්තා.. කකුල් දෙක දිව්වත් කටට බ්‍රේක් නෑ නොවැ..
"ඔබතුමා කැපුවෙ නැතොත්.. වැඩි කල් යන්න කලින් මිනිස්සු ඔබතුමාව කපලා දායි... "
දඩස්....
සිහිය එන කොට හිටියේ ගෙදර ඇඳ උඩ.. අවුලක් නෑ පොඩි තුවාල ටිකක් තියෙන්නේ...
